«Жауынгер – әскери өмірде шыңдалады» - демекші, егеменді еліміздің Қарулы күштерінің әскери қызметшілері әр жылға белгіленген оқу жылында жауынгерлік даярлықтарын арттырып, Отан қорғау жолындағы қызметте өздерінің әскери біліктіліктерін шеберлікпен меңгеріп келе жатқандығына жоғары баға беруге тиіспіз. Бұл күндері «Астана» өңірлік қолбасшылығы әскерлеріне қарасты 06708, 18405 әскери бөлімдерінде 2022 оқу жылының қорытынды тексерулері өтуде.
06708 әскери бөліміндегі оқу жылын қорытындылауды Қазақстан Республикасы Қарулы күштері Құрлық әскерлері басқолбасшысы басқармасының жұмылдыруды ұйымдастыру бас басқармасының бастығы полковник Бақытжан Құдабаев басқарса, 18405 әскери бөлімі жеке құрамының қорытынды сабақтарына баға беруді «Астана» өңірлік қолбасшылығы әскерлері қолбасшысы басқармасының зымыран әскерлері және артиллерияның бастығы полковник Дәулет Есенұлы Кашкимбеков өз бақылауына алған.
Биылғы оқу жылы Қарулы күштерінің құрылған күніне 30 жыл толуына орай, «Қарулы күштердің 30 жылдығына – біздің ерен еңбегіміз!» атты жауынгерлік ұранымен басталғанын атап өткен жөн.
Оқу жылының қорытынды сабақтарына әскери бөлімдердегі жеке құрам түгел қатысады. Сабақ қорытындысын шығару барысында әрбір әскери қызметшінің жауынгерлік даярлықтағы ептілігіне, оқу жылында меңгерген біліміне және шеберлік әдіс-тәсіліне баға беріледі. Сонымен қатар, жеке құрамның әскери техниканы жетік меңгеру және жауынгерлік даярлықты жетілдірудегі дене бітімін шыңдауды да бағалау бар екенін еске саламыз.
Comments