Ардағым, арман қуып мен кеткелі
Қанша рет көктем келіп, жер көктеді?!
Бір кезде бөбегім деп тербетіп ең,
Келесің әлі күнге тербеп мені...
15 мамыр қазақ ақыны, поэзия зергері Сағи Жиенбаевтың туғанына 90 жыл. Ақтөбе облысының Байғанин ауданындағы Оймауыт ауылында дүниеге келген. Балалық шағы Отан соғысына тап келіп, көп қиындық көрсе де, ол үнемі кітап оқып, әдебиетті ерекше жақсы көрген. Ақынның алғышқы «Қарлығаш» атты өлеңдер жинағы 1959 жылы жарық көріп, қалың оқырманды ерекше тынысымен баурап алды. Сағи Жиенбаев поэзиясының тәрбиелік мәні зор. Онда туған жерді қастерлеу, отанды сүю және тағы да басқа түрлі тақырыптарға жазылған өлеңдері жинақталған. Бұл жыр жинағы ақынның тұңғыш қызына арналған екен. Оның операға да қосқан үлесі аз емес. Сағи Жиенбаев Ғазиза Жұбанованың «Еңлік-Кебек», сондай-ақ Базарбай Жұманиязовтың «Махамбет» операларының либреттасын жазып берген. Тіпті, оның өлеңдері түркі тілдеріне аударылып, бірнеше шет ел тілдерінде басылып шықты. Ақын бірнеше әнге мәтін жазып, орыстың және басқа ақындардың өлеңдерін тәржімалап, кітап етіп шығарды. Өкінішке орай, халқына осындай жыр сыйлаған ақын дәл туған күнінде, 60 жасында дүниеден озды.
Сағи Жиенбаев атындағы Ақтөбе облыстық жасөспірімдер кітапханасы Ақтөбе облысының мәдениет, архивтер және құжаттама басқармасының қолдауымен лирик ақын Сағи Жиенбаевтың 90 жылдығына арнап «Сағи лирикасы сурет әлемінде» республикалық сурет байқауын жариялаған болатын. Байқау шарттарына сай ақынның сюжеттік өлеңдері мен балладаларының желісімен сурет салу керек. Байқауға түрлі-түсті бояу, акварель, гуашь тағы да басқа бояу түрімен салынған 136 жұмыс келіп түсті. Ақынның лирикасын насихаттау мақсатында ұйымдастырылған республикалық сурет байқауының жеңімпаздарын марапаттау кеші 15 мамыр күні ақынның туған күні қарсаңында өтті. Шараға Қазақстан Жазушылар Одағының мүшесі, республикалық ақындар мүшәйраларының жеңімпазы, республикалық жас қаламгерлер фестивалінің лауреаты, Тұманбай Молдағалиев атындағы арнайы сыйлықтың иегері, Мағжан Жұмабаевқа арналған республикалық жыр мүшәйрасының жүлдегеріГүлжайнар Нәренқызы, Ақын ҚР журналистер одағының мүшесі, облыстық «Ақтөбе» газетінің тілшісі, «Ақпарат саласының үздігі» төсбелгісінің иегері Индира Өтеміс, облыстық өнер музейінің кіші ғылыми қызметкері Гүлсезім Бауыржанқызы қатысты. ҚР журналистер одағының мүшесі, Республикалық «Ана» журналының редакторы, ҚР Мәдениет саласының үздігі, Мәдениет саласының ардагері Алмагүл Сарыбаева ақын туралы естеліктер айтып, шараның шымылдығын ашып берді. Ынталандыру сыйлығымен «Таулар» суреті бойынша Ақтөбе қаласы №36 мектеп оқушысы Базарбай Гүлсезім, «Көктемгі дала» суретімен Шалқар ауданы көркемсурет мектебі оқушысы Әсемай Мухамбеталина марапатталды. Үшінші орынды «Қыран мен жылан» суретімен Байғанин ауданы Ақнәзік Әуелбаева және «Әлия» суретімен Ақтөбе қаласы №17 мектеп оқушысы Камила Давлеталина иеленсе, екінші орынды «Әже мен немере» суретімен Ақтөбе қаласы №36 мектеп оқушысы Гаухар Қуанышбаева жеңіп алды. Жүлделі бірінші орын «Әже мен немере» суретімен Әкімжан Аманжанға бұйырды. Бас жүлде «Жайық» суретімен Атырау облысы Ұлықбек Талғатұлына берілді, жетекшісі Қисметов Талғат Геннадийұлы. Абай атындағы қалалық кітапхана оқырмандары шараға қатысып, ақын өлеңдерін оқыды. Ғазиза Жұбанова атындағы облыстық филармония әншісі Нұрлан Әбдіков Сағи Жиенбаевтың «Ауыл қарттары» өлеңін шырқап, Қазанғап атындағы балалар өнер мектебінің оқушысы Мәди Өмірбай қазақтың ұлттық аспабы домбырамен «Ерке сылқым» күйін орындады.
Лаура Сұлтанбекова.
Сағи Жиенбаев атындағы
облыстық жасөспірімдер
кітапханасының қызметкері.
Ақтөбе қаласы.
Comments